असोज ३, काठमाडौं । छैटाैँ संस्करणकाे साफ महिला च्याम्पियनशिप २०२२ काे उपाधि बङ्ग्लादेशले जितेकाे छ ।
दशरथ रङ्गशालामा भएकाे खेलमा नेपाललाई ३-१ ले हराउँदै बङ्ग्लादेशले उपाधि जितेको हो । बङ्ग्लादेशकाे जितमा स्याम सुन्हारले खेलकाे १४ औँ र श्रीमाेती के. सरकारले ४२ र ७७ औँ मिनेटमा गाेल गरिन् । नेपालका लागि अनिता बस्नेतले खेलकाे ७० औँ मिनेटमा सान्त्वना गाेल गरिन् ।
नेपाललाई हराएको बंगलादेशले साफ महिला च्याम्पियनसिपको पहिलो उपाधि जितेर इतिहास बनाएको छ । यसअघि पाँच संस्करणमा भारत च्याम्पियन बनेको थियो ।
त्यस्तै नेपाल भने पाँचाैँ पटक फाइनलमा पराजित बनेकाे छ । यसअघि नेपाल सन् २०१०, २०१२, २०१४ र २०१९ को महिला साफ च्याम्पियनसिपको फाइनलमा पुगेर पनि उपाधि जित्न असफल भएको थियो । नेपालले चार पटक फाइनलमा भारतसँग पराजित हुँदै आएको थियो ।
यसपटकको सेमिफाइनलमा भारतलाई पराजित गर्दै फाइनल पुगेको नेपाल बङ्ग्लादेशसँग पराजित हुँदा फेरि पनि उपाधि जित्न असफल भयाे । नेपाललाई हराएकाे बङ्गलादेश पहिलो पटक च्याम्पियन बनेको हो ।