असार २३, काठमाडौं । बाजुराको बूढीगङ्गा नगरपालिकामा आज पालिका चुनावका लागि पुनः मतदान सुरु भएको छ । बिहान ७ बजेदेखि सुरु भएको मतदान बेलुका ५ बजेसम्म चल्नेछ ।
जिल्ला निर्वाचन कार्यालय अनुसार अहिले मतदान शान्तिपूर्ण रुपमा भइरहेको छ । सुरक्षा व्यवस्थाकालागि सेना, सशस्त्र प्रहरी, नेपाल प्रहरी र राष्ट्रिय अनुसन्धानसहित झन्डै १ हजार २ सय सुरक्षाकर्मी परिचालन गरिएको छ ।
नगरपालिकाको मेयर पदमा एमालेबाट रामबहादुर बानियाँ र कांग्रेसबाट रङ्गबहादुर खाती उम्मेदवार छन् ।
१० वटा मतदानस्थल र १९ वटा केन्द्र रहेको बूढीगङ्गामा पुनः मतदान गराउन ९५ जना कर्मचारी खटिएका जिल्ला निर्वाचन कार्यालयले जनाएको छ । १० वटा वडा रहेको नगरपालिकाको मतदाता सङ्ख्या झन्डै १ हजार ३ सय रहेको छ ।
यसअघि गएको वैशाख ३० गते भएको मतदानका क्रममा बुथ कब्जा भएको विवादपछि निर्वाचन आयोगले पुनः मतदानको निर्णय गरेको थियो ।